കാഞ്ഞങ്ങാട്: കീം പരീക്ഷയില് ജില്ലയില് ഒന്നാംസ്ഥാനം കാഞ്ഞങ്ങാട് വെള്ളിക്കോത്ത് സ്വദേശി സാരംഗ് സുനിലിന്. 600ല് 556.6595 സ്കോര് നേടിയ സാരംഗ് സംസ്ഥാനതലത്തില് 86-ാം റാങ്കാണ് കരസ്ഥമാക്കിയത്. നേരത്തെ ജെഇഇ അഡ്വാന്സ്ഡ് പരീക്ഷയില് അഖിലേന്ത്യാതലത്തില് 6778-ാം റാങ്ക് നേടിയ സാരംഗ് ഐഐടിയില് തന്റെ സീറ്റ് ഉറപ്പിച്ചിട്ടുണ്ട്.
ഏത് ഐഐടിയിലാണ് അഡ്മിഷന് ലഭിക്കുകയെന്ന കാര്യം ഉടന് അറിയാന് കഴിയുമെന്നും ഇലക്ട്രിക്കല് എന്ജിനിയറിംഗ് പഠിക്കാനാണ് താത്പര്യമെന്നും സാരംഗ് പറഞ്ഞു. പത്താംക്ലാസ് വരെ പെരിയ നവോദയ സ്കൂളിലായിരുന്നു പഠനം. അവന്തി ഫെല്ലോസ് സ്കോളര്ഷിപ്പോടെ കോട്ടയം നവോദയ വിദ്യാലയത്തിലാണ് പ്ലസ്ടു പഠനം നടത്തിയപ്പോള് അതിനൊപ്പം പാലാ ബ്രില്യന്റ് സ്റ്റഡി സെന്ററിന്റെ കോച്ചിംഗുമുണ്ടായിരുന്നു.
കേരള വിഷന് കേബിള് ഓപ്പറേറ്റര് വെള്ളിക്കോത്തെ കെ. സുനില്കുമാറിന്റെയും പെരിയ വില്ലേജ് ഓഫീസിലെ ഫീല്ഡ് അസിസ്റ്റന്റ് കെ. സജിതയുടെയും മകനാണ്. സഹോദരന് സംവേദ് വെള്ളിക്കോത്ത് എംപിഎസ് ജിവിഎച്ച്എസ്എസിലെ നാലാം ക്ലാസ് വിദ്യാര്ഥിയാണ്.